សូមស្វាគមន៍មកកាន់ក្រុម ឡាយអិន: និយាយទូរស័ព្ទយ៉ាងម៉េចទើបនាងចូលចិត្ត?

និយាយទូរស័ព្ទយ៉ាងម៉េចទើបនាងចូលចិត្ត?

ភ្នំពេញៈ ជាធម្មតា នៅពេលដែលអ្នកមានចំណាប់អារម្មណ៍ទៅលើនារីណាម្នាក់ អ្នកប្រាកដ ជាចង់ដឹង ចង់លឺ និងចង់នៅក្បែរនាងជាក់ជាពុំខាន ដោយគ្រាន់អ្នកមិនទាន់ប្រាកដក្នុងចិត្តថាគេមានចំណាប់អារម្មណ៍មក លើអ្នកវិញ ឬក៏គេមានគូរស្នេហ៍ហើយឬនៅតែប៉ុណ្ណោះ។

មានបុរសមួយចំនួនហាក់មានការភិតភ័យក្នុងការនិយាយប្រាស្រ័យ ទាក់ទងជាមួយនឹងមនុស្សស្រីដែលខ្លួនមានចំណាប់អារម្មណ៍ចង់ធ្វើជាគូរ សង្សារ ឬគូរអនាគត ដោយគេបានដឹងទៀតផងថានាងនៅទំនេរមិនទាន់មាននរណាម្នាក់ដាក់ ពាក្យសុំធ្វើជាម្ចាស់បេះដូង ហើយកត្តានេះហាក់បង្ហាញនូវការបាត់បង់ឱកាសរបស់ខ្លួន ដែលបុរសខ្លួនឯងផ្ទាល់គួរតែពង្រឹងសមត្ថភាពក្នុងការទាក់ទង (ញ៉ែ) និងសេចក្ដីក្លាហានក្នុងការនិយាយស្ដី ក៏ដូចជាប្រើប្រាស់នូវពាក្យពេជន៍ពិរោះពិសារគួរជាទីទាក់ទាញ ចិត្តនាងផងនោះ។

ប្រសិនបើអ្នកនិយាយទូរស័ព្ទជាមួយមនុស្សស្រីដែលអ្នកចាប់អារម្មណ៍ យើងត្រូវយល់ដឹងនូវតិចនិចមួយចំនួន ដើម្បីជាស្ពានក្នុងការបង្ហាញនូវមនោសញ្ចេតនារបស់អ្នកឲ្យនាង បានដឹង ដោយក្នុងនោះរួមមាន៖

១- ភាពក្លាហានៈ ប្រសិនបើអ្នកនិយាយស្ដីជាមួយនាងក្នុងលក្ខណៈអឹមអៀន មិនសូវនិយាយស្ដី ឬមិនសូវមានសំណួរសួរទៅគេទេ នោះគេប្រាកដជាធុញនឹងអ្នកជាក់ជាពុំខាន ព្រោះពេលវេលានិយាយទូរស័ព្ទ គឺជាពេលដែលភាគីទាំងពីរបង្ហាញនូវអារម្មណ៍របស់ខ្លួនចំពោះការកសាង មិត្តភាព មិនមែនជាពេលមកស្ដាប់និងឆ្លើយសំណួរច្រំដែល ហើយមនុស្សស្រីភាគច្រើនមិនចូលចិត្តចំណាយពេលវេលានិយាយទូរស័ព្ទដែល ប្រកបទៅដោយភាពធុញទ្រាន់ គ្មានប្រធានបទនិយាយគួរជាទីចាប់អារម្មណ៍ឡើយ។ ដូច្នេះ អ្នកត្រូវមានសេចក្ដីក្លាហាន និងមិនត្រូវមានភាពអៀនខ្មាស់ក្នុងការនិយាយទូរស័ព្ទជាមួយនាងជា ដាច់ខាត ទោះបីជាវាជាលើកដំបូងសម្រាប់អ្នកក្ដី។

២-ចំណូលចិត្តៈ នៅពេលដែលអ្នកមានភាពក្លាហានគ្រប់គ្រាន់ហើយ អ្នកត្រូវព្យាយាមស្វែងយល់អំពីចំណង់ចំណូលចិត្តរបស់នារីដែលអ្នក ចាប់អារម្មណ៍។ ហេតុអ្វី? វាគ្មានអ្វីជាអាថ៌កំបាំងទេ ការដែលយើងត្រូវដឹងអំពីចំណង់ចំណូលចិត្តរបស់នាង ព្រោះវាជាស្ពានមួយសម្រាប់អ្នកក្នុងការគ្រប់គ្រង និងអូសបន្លាយពេលវេលានិយាយទូរស័ព្ទជាមួយនាង ដោយហេតុថា នៅពេលដែលនាងនិយាយដល់ប្រធានបទដែលនាងចូលចិត្តហើយ នាងនឹងលែងមានភាពធុញទ្រាន់ក្នុងការនិយាយទូរស័ព្ទជាមួយអ្នក ហើយគេច្បាស់ជាសួរអ្នកវិញជាក់ជាពុំខានថាតើអ្នកចិត្តអ្វី និងមិនចូលចិត្តអ្វី ចំណែកឯប្រធានបទសម្រាប់និយាយរវាងអ្នកនិងគេគឺកាន់តែមានច្រើន ហូរហែរឥតដាច់។ ម្យ៉ាងវិញទៀតវាក៏ជាឱកាសមាស ឱកាសប្រាក់សម្រាប់អ្នកផងដែរ ដោយអ្នកអាចប្រៀបធៀបនូវចំណង់ចំណូលចិត្តរបស់អ្នកនិងគេ និងអាចស្ទាបស្ទង់មើលអំពីអត្តចរិតរបស់គេបានកាន់តែច្បាស់ទៀតផង។

៣-ហាមអួតៈ ក្នុងការនិយាយទូរស័ព្ទ អ្នកមិនគួរនិយាយអួតអំពីខ្លួនឯងជ្រុលនោះទេ ព្រោះវាអាចធ្វើឲ្យមានការប៉ះពាល់ដល់អារម្មណ៍របស់នាង ម្យ៉ាងទៀតនោះ មនុស្សស្រីភាគច្រើនមិនចូលចិត្តអ្នកអួតឡើយ ទោះបីជាអ្នកមានលុយ មានឡានក្ដី ក៏ប៉ុន្ដែគេក៏ឲ្យតម្លៃចំពោះខ្លួនគេផ្ទាល់ដែរ ហើយក៏មិនប្រាកដថាគេនឹងមានភាពពុះកញ្ជ្រោលចំពោះអ្វីដែលអ្នកបាន ប្រាប់គេនោះឡើយ។ មាននារីជាច្រើនមកហើយដែលធ្លាប់បាននិយាយអំពីភាពមិនពេញចិត្តរបស់ ខ្លួនចំពោះការនិយាយទូរស័ព្ទជាមួយបុរសពូកែអួត ធ្វើមើលមកមានតែឯង ដោយនាងយល់ថា ការអួតរបស់បុរសនោះជាការមើលងាយនាងទៅវិញ។

៤-វោហាសាស្ដ្រៈ អ្នកត្រូវចេះរៀបចំពាក្យពេជ្រន៍ក្នុងការនិយាយស្ដី ប្រកបទៅដោយសីលធម៌ និងភាពរួសរាយ ដោយមិនត្រូវសួរនូវសំណួរដាក់សម្ពាធទៅនាងឡើយ។ ជាងនេះទៅទៀត អ្នកត្រូវចេះនិយាយពាក្យពេជ្រន៍បែបកំប្លែងសើចសប្បាយដើម្បីកំដរ បរិយាកាសនិយាយទូរស័ព្ទឲ្យកាន់តែមានភាពស្និទ្ធស្នាលជាងមុនទៅទៀត។ ការនិយាយបែបកំប្លែងលេងសើចនេះទៀតសោត គឺជាចំណុចដ៏ពិសេសមួយសម្រាប់អ្នកក្នុងការកសាងមិត្តភាពជាមួយនាង ត្បិតនៅពេលដែលនាងមិនសប្បាយចិត្ត អ្នកទំនងក្លាយជាមនុស្សម្នាក់ដែលនាងចង់និយាយទូរស័ព្ទជាមួយ ហើយវាក៏ជាពេលវេលាពិសេសសម្រាប់អ្នកក្នុងការលួងលោមដល់ចិត្តនាង ផងដែរ។

នៅមានតិចនិចមួយចំនួនទៀត ដែលខ្ញុំនឹងត្រូវប្រាប់អ្នកបន្ដទៅទៀត ប៉ុន្ដែខ្ញុំសុំស្លេះត្រឹមនេះសិនចុះ ត្បិតខ្ញុំត្រូវទៅសួរបងៗដែលពូកែខាងទាក់ទងស្រីៗ និងអនុវត្តខ្លួនឯងជាមុនសិនមុននឹងសរសេរ។ ចំពោះតិចនិចទាំងបួនខាងលើ ខ្ញុំបានអនុវត្តរួចហើយ គឺវាពិតជាមានប្រសិទ្ធភាពប្រាកដមែន។

ប្រសិនបើលោកអ្នក ជាពិសេសអ្នកដែលមិនធ្លាប់មានបទពិសោធន៍ក្នុងការនិយាយទូរស័ព្ទជាមួយ មនុស្សស្រីទេ អ្នកអាចធ្វើការអនុវត្តតាមរយៈការណែនាំបាន ហើយចំពោះអ្នកដែលមានភាពជោគជ័យខ្លាំងក្នុងការទាក់ទងស្រីៗ សូមមេត្តាជួយផ្ដល់យោបល់បន្ថែមដល់ខ្ញុំជាអ្នកសរសេរផង។ អរគុណច្រើន ជួបគ្នានៅថ្ងៃសៅរ៍ សប្ដាហ៍ក្រោយ។

No comments:

Post a Comment

Subscribe to: Post Comments (Atom)