សូមស្វាគមន៍មកកាន់ក្រុម ឡាយអិន: ទឹកចិត្តម្ដាយ

ទឹកចិត្តម្ដាយ

ម្ដាយភាគច្រើនតែងតែមានទឹកចិត្តស្រឡាញ់កូនៗរបស់ខ្លួនជាង អាយុជីវិតខ្លួន ហើយពួកគាត់ហ៊ានលះបង់អ្វីៗគ្រប់បែបយ៉ាងដើម្បីពួកគេ ទាំងកម្លាំងកាយ និងកម្លាំងចិត្ត។ ទង្វើរបស់អ្នកម្ដាយបានស្ដែងចេញឡើងតាំងពីកូនៗបានចាប់កំណើតក្នុង ផ្ទៃរបស់គាត់ រហូតដល់កើតចេញពីផ្ទៃ និងបន្ដធំធាត់រហូតដល់វ័យធំដឹងក្ដី ដោយគាត់បានខិតខំយកចិត្តទុកដាក់យ៉ាងខ្លាំងចំពោះសុខភាព ចំណេះវិជ្ជា និងអនាគតរបស់កូនៗជាដើម។

រូបភាពបរទេស

កាលពីកូននៅក្នុងផ្ទៃ ម្ដាយមិនដែលហ៊ានធ្វើការអ្វីឡើយ ត្បិតខ្លាចប៉ះពាល់ដល់ទារក និងខិតខំហូបអាហារណាដែលបំប៉នដល់កូន ប្រកបទៅដោយទឹកចិត្តស្រឡាញ់និងចង់ឃើញមុខកូននាពេលឆាប់ៗ។

ពេលដែលកូនកើតចេញពីផ្ទៃ ម្ដាយសប្បាយចិត្តខ្លាំងណាស់ព្រោះគាត់បានឃើញថាកូនរបស់គាត់មាន កាយសម្បទាគ្រប់គ្រាន់ មិនគរ ថ្លង់ ឬមានបញ្ហាអ្វីមួយ ហើយគាត់បានខិតខំមើលថែយ៉ាងយកចិត្តទុកដាក់ សូម្បីតែសត្វស្រមោច ឬមូសមួយក៏ប៉ះកូនមិនបាន។ ហើយអ្វីដែលកូនៗគ្រប់រូបត្រូវដឹងនោះគឺកាលដែលគាត់នៅក្រមុំ គាត់ស្លៀកពាក់បិទបាំងរាងកាយខ្លាំងណាស់ ព្រោះតែគាត់មានភាពខ្មាសអៀនមិនហ៊ានបញ្ចេញសាច់ ប៉ុន្ដែនៅពេលដែលកូនស្រែកយំឃ្លានបៅ អ្នកម្ដាយគាត់សុខចិត្តបំបៅដោះកូនក្នុងចំណោមហ្វូងមនុស្ស ដោយសារតែអាណិតកូន។

ពេលដែលកូនចម្រើនវ័យបន្ដិច ម្ដាយគាត់សប្បាយចិត្តណាស់ព្រោះគាត់ឃើញកូនរបស់គាត់ចេះដើរ ចេះនិយាយ និងចេះត្រងត្រាប់នៅអ្វីដែលគាត់បង្រៀន ហើយក្នុងដួងចិត្តរបស់គាត់ប្រកបទៅដោយមោទនភាព។

នៅពេលដែលកូនចេះទាររករបស់ញ៉ាំ ម្ដាយបានបេះអាហារពីមាត់ពីកដើម្បីឲ្យកូន ទាំងក្រពះរបស់គាត់នៅឃ្លាននៅឡើយ ប៉ុន្ដែចិត្តរបស់គាត់បានប្រាប់ទៅក្រពះគាត់ថា កូនគាត់ក៏ឃ្លានដូចគាត់ដែរ ហើយគ្នានៅក្មេងត្រូវការអាហារបំប៉ន។

នៅពេលដែលកូនគ្រប់អាយុចូលរៀន ម្ដាយបានប្រញ៉ាប់ប្រញ៉ាល់បញ្ជូនកូនទៅរៀន ព្រោះគាត់ខ្លាចកូនរបស់គាត់ជាមនុស្សល្ងង់ខ្លៅមិនចេះដឹងដូចគេ ហើយគាត់ចង់ឃើញកូនរបស់គាត់មានចំណេះដឹងខ្ពង់ខ្ពស់ និងមានការងារល្អមួយសម្រាប់ជីវិត បើទោះបីជាកូនមិនសងគុណគាត់វិញក៏ដោយ។

នៅពេលកូនចូលដល់វ័យជំទង់ ម្ដាយចាប់ផ្ដើមប្រឈមមុខកាន់តែខ្លាំងចំពោះស្ថានភាពសេដ្ឋកិច្ច គ្រួសារ ព្រោះគាត់ត្រូវគិតអំពីចំណាយទៅលើការសិក្សា អាហារ សម្លៀកបំពាក់ និងតម្រូវការមួយចំនួនទៀតរបស់កូនៗ ហើយគាត់ចាប់ផ្ដើមលែងសូវគិតអំពីខ្លួនឯងដូចកាលដែលគាត់នៅក្រមុំ ហើយ ដោយសារតែគាត់គិតច្រើនកន្លងអំពីភាពសុខដុមរបស់កូន។

នៅពេលដែលកូនចង់បានអ្វីមួយ ម្ដាយគាត់ប្រឹងប្រែងស្ទើរគ្រប់វិធីដើម្បីបំពេញបំណងរបស់កូន ទោះបីជាត្រូវប្រឈមមុខជាមួយនឹងឪពុកក៏ដោយ គឺធ្វើយ៉ាងម៉េចឲ្យតែកូនរបស់គាត់សប្បាយចិត្ត។

នៅពេលដែលកូនៗមានបញ្ហា ម្ដាយតែងតែជាមនុស្សទីមួយដែលមកនិយាយលួងលោម និងលើកទឹកចិត្តកូន ដើម្បីឲ្យកូនបានក្លាយទៅជាមនុស្សរឹងម៉ាំ ហ៊ានប្រឈមមុខចំពោះបញ្ហាទាំងនោះ។ ទឹកចិត្តរបស់អ្នកចំពោះកូនហាក់ដូចជាមានច្រើនពេកកន្លងហើយ ហើយគ្មានអ្វីអាចមកប្រៀបផ្ទឹមបានឡើយ។

ទឹកចិត្ត និងការលះបង់របស់អ្នកម្ដាយ ប្រសិនបើសរសេរ ទោះបីជាមានសៀវភៅកម្រាស់១០០០សន្លឹកក៏ដោយ ក៏យើងមិនអាចសរសេរគ្រាន់ឡើយ ហើយអ្វីដែលគាត់ធ្វើទាំងអស់នោះគឺមានគោលដៅតែមួយមុខគត់ ដោយគ្មានអ្វីក្រៅពីចង់ឃើញកូនរបស់គាត់មានអនាគតល្អ ជាមនុស្សល្អក្នុងសង្គម និងគ្រួសារ។

ក្រឡេកមកមើលទឹកចិត្តកូនវិញម្ដង តើអ្នកគ្រប់គ្នាដែលបានលះបង់អ្វីខ្លះដើម្បីគាត់ហើយឬនៅ???????? តាមការសង្កេត មានកូនៗមួយចំនួនមិនបានគិតដល់ទឹកចិត្ត និងការលះបង់របស់ម្ដាយខ្លួនឡើយ។ សូមគិតឲ្យបានច្បាស់ចំពោះរឿងរ៉ាវទាំងឡាយណាដែលអាចបង្កនូវផល ប៉ះពាល់ដល់ទឹកចិត្តរបស់អ្នកមានគុណរបស់អ្នក។ សូមស្រឡាញ់ម្ដាយអ្នក អោយបានត្រឹម ៧០ភាគរយនៃក្ដីស្រឡាញ់របស់គាត់ចំពោះអ្នក គឺវាគ្រប់គ្រាន់សម្រាប់គាត់ណាស់ទៅហើយ ប៉ុន្ដែប្រសិនបើច្រើនជាងនេះគឺកាន់តែល្អ។

No comments:

Post a Comment

Subscribe to: Post Comments (Atom)